यही मसअला है जो ज़ाहिदो तो मुझे कुछ इस में कलाम है
वही शय हलाल है ख़ुल्द में वही मय-कदे में हराम है
मिरी आँख में जो समा गया मिरे दिल में जिस का मक़ाम है
अभी मुझ से है वो अलग-थलग न पयाम है न सलाम है
यही कहना उस से पयाम्बर कि बस आख़िरी ये पयाम है
जो ज़रा भी जाने में देर की तो किसी का काम तमाम है
कभी क़त' की मिरी गुफ़्तुगू कभी कह दिया मुझे क्या है तू
ये बता तू ओ बुत-ए-जंग-जू कोई ये भी तर्ज़-ए-कलाम है
कोई ज़िक्र ग़ैर का ये न था जिसे आप सुन के हुए ख़फ़ा
मुझे अपने बख़्त से है गिला मुझे अपने दिल से कलाम है
जो चला तो बज़्म-ए-सुरूर में जो रहा तो आलम-ए-नूर में
मिरे दिल में कैफ़-ए-मुदाम है मिरे सर में गर्दिश-ए-जाम है
वही शिकवा तुझ को रक़ीब का वही रोना अपने नसीब का
ये बता तू ओ दिल-ए-मुब्तला तुझे और भी कोई काम है
मिरा नाम ले के न कोसिए ये कहा तो हँस के वो बोल उठे
मुझे क्या ख़बर थी ज़माने में फ़क़त आप ही का ये नाम है
मुझे कुफ़्र ओ दीं से ग़रज़ नहीं कि मैं एक बंदा-ए-इश्क़ हूँ
कोई शैख़ हो कि हो बरहमन मिरा दूर ही से सलाम है
वही आसमान है वही ज़मीं मगर आँख उस की जो फिर गई
न वो दिन है अब न वो रात है न वो सुब्ह है न वो शाम है
बहुत और माहिर-ए-फ़न हैं यूँ बहुत और अहल-ए-सुख़न हैं यूँ
मगर आ गया जो पसंद उन्हें वो 'हफ़ीज़' ही का कलाम है
yahī mas.ala hai jo zāhido to mujhe kuchh is meñ kalām hai
vahī shai halāl hai ḳhuld meñ vahī mai-kade meñ harām hai
mirī aañkh meñ jo samā gayā mire dil meñ jis kā maqām hai
abhī mujh se hai vo alag-thalag na payām hai na salām hai
yahī kahnā us se payāmbar ki bas āḳhirī ye payām hai
jo zarā bhī jaane meñ der kī to kisī kā kaam tamām hai
kabhī qat' kī mirī guftugū kabhī kah diyā mujhe kyā hai tū
ye batā tū o but-e-jañg-jū koī ye bhī tarz-e-kalām hai
koī zikr ġhair kā ye na thā jise aap sun ke hue ḳhafā
mujhe apne baḳht se hai gila mujhe apne dil se kalām hai
jo chalā to bazm-e-surūr meñ jo rahā to ālam-e-nūr meñ
mire dil meñ kaif-e-mudām hai mire sar meñ gardish-e-jām hai
vahī shikva tujh ko raqīb kā vahī ronā apne nasīb kā
ye batā tū o dil-e-mubtalā tujhe aur bhī koī kaam hai
mirā naam le ke na kosiye ye kahā to hañs ke vo bol uThe
mujhe kyā ḳhabar thī zamāne meñ faqat aap hī kā ye naam hai
mujhe kufr o diiñ se ġharaz nahīñ ki maiñ ek banda-e-ishq huuñ
koī shaiḳh ho ki ho barhaman mirā duur hī se salām hai
vahī āsmān hai vahī zamīñ magar aañkh us kī jo phir ga.ī
na vo din hai ab na vo raat hai na vo sub.h hai na vo shaam hai
bahut aur māhir-e-fan haiñ yuuñ bahut aur ahl-e-suḳhan haiñ yuuñ
magar aa gayā jo pasand unheñ vo 'hafīz' hī kā kalām hai
یہی مسئلہ ہے جو زاہدو تو مجھے کچھ اس میں کلام ہے
وہی شے حلال ہے خلد میں وہی میکدے میں حرام ہے
مری آنکھ میں جو سما گیا مرے دل میں جس کا مقام ہے
ابھی مجھ سے ہے وہ الگ تھلگ نہ پیام ہے نہ سلام ہے
یہی کہنا اس سے پیامبر کہ بس آخری یہ پیام ہے
جو ذرا بھی جانے میں دیر کی تو کسی کا کام تمام ہے
کبھی قطع کی مری گفتگو کبھی کہہ دیا مجھے کیا ہے تو
یہ بتا تو او بت جنگجو کوئی یہ بھی طرز کلام ہے
کوئی ذکر غیر کا یہ نہ تھا جسے آپ سن کے ہوئے خفا
مجھے اپنے بخت سے ہے گلہ مجھے اپنے دل سے کلام ہے
جو چلا تو بزم سرور میں جو رہا تو عالم نور میں
مرے دل میں کیف مدام ہے مرے سر میں گردش جام ہے
وہی شکوہ تجھ کو رقیب کا وہی رونا اپنے نصیب کا
یہ بتا تو او دل مبتلا تجھے اور بھی کوئی کام ہے
مرا نام لے کے نہ کوسیئے یہ کہا تو ہنس کے وہ بول اٹھے
مجھے کیا خبر تھی زمانے میں فقط آپ ہی کا یہ نام ہے
مجھے کفر و دیں سے غرض نہیں کہ میں ایک بندۂ عشق ہوں
کوئی شیخ ہو کہ ہو برہمن مرا دور ہی سے سلام ہے
وہی آسمان ہے وہی زمیں مگر آنکھ اس کی جو پھر گئی
نہ وہ دن ہے اب نہ وہ رات ہے نہ وہ صبح ہے نہ وہ شام ہے
بہت اور ماہر فن ہیں یوں بہت اور اہل سخن ہیں یوں
مگر آ گیا جو پسند انہیں وہ حفیظؔ ہی کا کلام ہے