वो नाज़नीं ये नज़ाकत में कुछ यगाना हुआ
जो पहनी फूलों की बध्धी तो दर्द-ए-शाना हुआ
शहीद नाज़-ओ-अदा का तिरे ज़माना हुआ
उड़ाया मेहंदी ने दिल चोर का बहाना हुआ
शब उस के अफ़ई-ए-गेसू का जो फ़साना हुआ
हवा कुछ ऐसी बंधी गुल चराग़-ए-ख़ाना हुआ
न ज़ुल्फ़-ए-यार का ख़ाका भी कर सका मानी
हर एक बाल में क्या क्या न शाख़साना हुआ
तवंगरों को मुबारक हो शम-ए-काफ़ूरी
क़दम से यार के रौशन ग़रीब-ख़ाना हुआ
गुनाहगार हैं मेहराब-ए-तेग़ के साजिद
झुकाया सर तो अदा फ़र्ज़-ए-पंज-गाना हुआ
ग़ुरूर-ए-'इश्क़ ज़ियादा ग़ुरूर-ए-हुस्न से है
इधर तो आँख भरी दम उधर रवाना हुआ
दिखा दे ज़ाहिद-ए-मग़रूर को भी ऐ सनम आँख
जमाल-ए-हूर का हद से सिवा फ़साना हुआ
भरा है शीशा-ए-दिल को मय-ए-मोहब्बत से
ख़ुदा का घर था जहाँ वाँ शराब-ख़ाना हुआ
हवाए तुंद न छोड़े मिरे ग़ुबार का साथ
ये गर्द-ए-राह कहाँ ख़ाक-ए-आस्ताना हुआ
ख़ुदा के वास्ते कर यार चीन-ए-अबरू दूर
बड़ा ही 'ऐब लगा जिस कमाँ में ख़ाना हुआ
हुआ जो दिन तो हुआ उस को पास रुस्वाई
जो रात आई तो फिर नींद का बहाना हुआ
न पूछ हाल मिरा चोब-ए-ख़ुश्क-ए-सहरा हूँ
लगा के आग मुझे कारवाँ रवाना हुआ
निगाह-ए-नाज़-ए-बुताँ से न चश्म-ए-रहम भी रख
किसी का यार नहीं फ़ित्ना-ए-ज़माना हुआ
असर किया तपिश-ए-दिल ने आख़िर उस को भी
रक़ीब से भी मिरा ज़िक्र ग़ाएबाना हुआ
हवाए तुंद से पत्ता अगर कोई खड़का
समंद-ए-बाद-ए-बहारी का ताज़ियाना हुआ
ज़बान-ए-यार ख़मोशी ने मेरी खुलवाई
मैं क़ुफ़्ल बन के कलीद-ए-दर-ए-ख़ज़ाना हुआ
किया जो यार ने कुछ शग़्ल-ए-बर्क़-अंदाज़ी
चराग़-ए-ज़िंदगी-ए-ख़िज़र तक निशाना हुआ
रहा है चाह-ए-ज़क़न में मिरा दिल-ए-वहशी
कुएँ में जंगली कबूतर का आशियाना हुआ
ख़ुदा दराज़ करे उम्र-ए-चर्ख़-ए-नीली को
ये बे-कसों के मज़ारों का शामियाना हुआ
नहीं है मिस्ल-ए-सदफ़ मुझ सा दूसरा कम-बख़्त
नसीब-ए-ग़ैर मिरे मुँह का आब-ओ-दाना हुआ
हिनाई हाथों से चोटी को खोलता है यार
कहाँ से पंजा-ए-मरजाँ हरीफ़-ए-शाना हुआ
दिखाई चश्म-ए-ग़ज़ालाँ ने हल्क़ा-ए-ज़ंजीर
हमें तो गोशा-ए-सहरा भी क़ैद-ख़ाना हुआ
हमेशा शाम से हम-साए मर रहे 'आतिश'
हमारा नाला-ए-दिल गोश को फ़साना हुआ
vo nāznīñ ye nazākat meñ kuchh yagāna huā
jo pahnī phūloñ kī baddhī to dard-e-shāna huā
shahīd nāz-o-adā kā tire zamāna huā
uḌāyā mehñdī ne dil chor kā bahāna huā
shab us ke afa.ī-e-gesū kā jo fasāna huā
havā kuchh aisī bañdhī gul charāġh-e-ḳhāna huā
na zulf-e-yār kā ḳhāka bhī kar sakā maanī
har ek baal meñ kyā kyā na shāḳhsāna huā
tavangaroñ ko mubārak ho sham-e-kafūrī
qadam se yaar ke raushan ġharīb-ḳhāna huā
gunāhgār haiñ mehrāb-e-teġh ke sājid
jhukāyā sar to adā farz-e-panj-gāna huā
ġhurūr-e-'ishq ziyāda ġhurūr-e-husn se hai
idhar to aañkh bharī dam udhar ravāna huā
dikhā de zāhid-e-maġhrūr ko bhī ai sanam aañkh
jamāl-e-hūr kā had se sivā fasāna huā
bharā hai shīsha-e-dil ko mai-e-mohabbat se
ḳhudā kā ghar thā jahāñ vaañ sharāb-ḳhāna huā
havā.e tund na chhoḌe mire ġhubār kā saath
ye gard-e-rāh kahāñ ḳhāk-e-āstāna huā
ḳhudā ke vāste kar yaar chīn-e-abrū duur
baḌā hī 'aib lagā jis kamāñ meñ ḳhāna huā
huā jo din to huā us ko paas rusvā.ī
jo raat aa.ī to phir niiñd kā bahāna huā
na pūchh haal mirā chob-e-ḳhushk-e-sahrā huuñ
lagā ke aag mujhe kārvāñ ravāna huā
nigāh-e-nāz-e-butāñ se na chashm-e-rahm bhī rakh
kisī kā yaar nahīñ fitna-e-zamāna huā
asar kiyā tapish-e-dil ne āḳhir us ko bhī
raqīb se bhī mirā zikr ġhā.ebāna huā
havā.e tund se pattā agar koī khaḌkā
samand-e-bād-e-bahārī kā tāziyāna huā
zabān-e-yār ḳhamoshī ne merī khulvā.ī
maiñ qufl ban ke kalīd-e-dar-e-ḳhazāna huā
kiyā jo yaar ne kuchh shaġhl-e-barq-andāzī
charāġh-e-zindagī-e-ḳhizar tak nishāna huā
rahā hai chāh-e-zaqan meñ mirā dil-e-vahshī
kuñ.eñ meñ jangalī kabūtar kā āshiyāna huā
ḳhudā darāz kare umr-e-charḳh-e-nīlī ko
ye be-kasoñ ke mazāroñ kā shāmiyāna huā
nahīñ hai misl-e-sadaf mujh sā dūsrā kam-baḳht
nasīb-e-ġhair mire muñh kā āb-o-dāna huā
hinā.ī hāthoñ se choTī ko kholtā hai yaar
kahāñ se panjā-e-marjāñ harīf-e-shāna huā
dikhā.ī chashm-e-ġhazālāñ ne halqa-e-zanjīr
hameñ to gosha-e-sahrā bhī qaid-ḳhāna huā
hamesha shaam se ham-sā.e mar rahe 'ātish'
hamārā nāla-e-dil gosh ko fasāna huā
وہ نازنیں یہ نزاکت میں کچھ یگانہ ہوا
جو پہنی پھولوں کی بدھی تو درد شانہ ہوا
شہید ناز و ادا کا ترے زمانہ ہوا
اڑایا مہندی نے دل چور کا بہانہ ہوا
شب اس کے افعئ گیسو کا جو فسانہ ہوا
ہوا کچھ ایسی بندھی گل چراغ خانہ ہوا
نہ زلف یار کا خاکہ بھی کر سکا مانی
ہر ایک بال میں کیا کیا نہ شاخسانہ ہوا
تونگروں کو مبارک ہو شمع کافوری
قدم سے یار کے روشن غریب خانہ ہوا
گناہ گار ہیں محراب تیغ کے ساجد
جھکایا سر تو ادا فرض پنجگانہ ہوا
غرور عشق زیادہ غرور حسن سے ہے
ادھر تو آنکھ بھری دم ادھر روانہ ہوا
دکھا دے زاہد مغرور کو بھی اے صنم آنکھ
جمال حور کا حد سے سوا فسانہ ہوا
بھرا ہے شیشۂ دل کو مئے محبت سے
خدا کا گھر تھا جہاں واں شراب خانہ ہوا
ہوائے تند نہ چھوڑے مرے غبار کا ساتھ
یہ گرد راہ کہاں خاک آستانہ ہوا
خدا کے واسطے کر یار چین ابرو دور
بڑا ہی عیب لگا جس کماں میں خانہ ہوا
ہوا جو دن تو ہوا اس کو پاس رسوائی
جو رات آئی تو پھر نیند کا بہانہ ہوا
نہ پوچھ حال مرا چوب خشک صحرا ہوں
لگا کے آگ مجھے کارواں روانہ ہوا
نگاہ ناز بتاں سے نہ چشم رحم بھی رکھ
کسی کا یار نہیں فتنۂ زمانہ ہوا
اثر کیا تپش دل نے آخر اس کو بھی
رقیب سے بھی مرا ذکر غائبانہ ہوا
ہوائے تند سے پتا اگر کوئی کھڑکا
سمند باد بہاری کا تازیانہ ہوا
زبان یار خموشی نے میری کھلوائی
میں قفل بن کے کلید در خزانہ ہوا
کیا جو یار نے کچھ شغل برق اندازی
چراغ زندگیٔ خضر تک نشانہ ہوا
رہا ہے چاہ ذقن میں مرا دل وحشی
کنویں میں جنگلی کبوتر کا آشیانہ ہوا
خدا دراز کرے عمر چرخ نیلی کو
یہ بے کسوں کے مزاروں کا شامیانہ ہوا
نہیں ہے مثل صدف مجھ سا دوسرا کم بخت
نصیب غیر مرے منہ کا آب و دانہ ہوا
حنائی ہاتھوں سے چوٹی کو کھولتا ہے یار
کہاں سے پنجۂ مرجاں حریف شانہ ہوا
دکھائی چشم غزالاں نے حلقۂ زنجیر
ہمیں تو گوشۂ صحرا بھی قید خانہ ہوا
ہمیشہ شام سے ہمسائے مر رہے آتشؔ
ہمارا نالۂ دل گوش کو فسانہ ہوا