'आरिफ़ है वो जो हुस्न का जूया जहाँ में है
बाहर नहीं है यूसुफ़ इसी कारवाँ में है
पीरी में शग़्ल-ए-मय है जवानाना रोज़-ओ-शब
बू-ए-बहार आती हमारी ख़िज़ाँ में है
होता है गुल के सूँघे से दूना गिरफ़्ता दिल
मुझ सा भी बद-दिमाग़ कम इस बोस्ताँ में है
पुश्त-ए-ख़मीदा देख के होता हूँ ना'रा-ज़न
करता हूँ सर्फ़-ए-तीर जो ज़ोर इस कमाँ में है
दिखला रही है दिल की सफ़ा दो-जहाँ की सैर
क्या आईना लगा हुआ अपने मकाँ में है
दीवाना जो न 'इश्क़ से हो आदमी नहीं
हुस्न-परी का जल्वा तिलिस्म-ए-जहाँ में है
परवानों की तरह है हुजूम-ए-क़दह-कशाँ
रौशन चराग़-ए-बादा जो मुग़ की दुकाँ में है
उस दिलरुबा के कूचे में आगे हवा से जाए
इतनी तो जान अब भी तन-ए-ना-तवाँ में है
दुनिया से कूच करना है इक रोज़ रहरवो
बाँग-ए-जरस से शोर यही कारवाँ में है
पढ़ सकता सरनविश्त का मतलब कोई नहीं
मा'लूम कुछ नहीं कि ये ख़त किस ज़बाँ में है
आइंदा-ओ-रविंदा की चलती हैं ठोकरें
जादा जो अपना था उसी ख़्वाब-ए-गिराँ में है
कुश्ते हैं बाग़ में भी तिरी तेग़-ए-नाज़ के
बू-ए-शहीद लाला में और अर्ग़वाँ में है
'आशिक़ के रंग-ए-ज़र्द को देखो तो हँस पड़ो
तासीर उस में भी है वो जो ज़ाफ़राँ में है
मा'दूम वो कमर है न मौहूम वो दहन
कहते हैं शा'इर उन के जो कुछ कुछ गुमाँ में है
गुल टूटते हैं होते हैं बुलबुल असीर-ए-दाम
सय्याद मुस्त'इद मदद-ए-बाग़बाँ में है
सरकश की मंज़िलत है सुबुक पेश-ए-ख़ाकसार
वो तमकनत ज़मीं की कहाँ आसमाँ में है
सुम्बुल से हाल-ए-गुल हूँ मैं ये कह के पूछता
किस सिलसिले में तू है ये किस ख़ानदाँ में है
दिल में ख़याल-ए-गेसू-ए-मुश्कीं है बद बला
ये मुर्ग़-ए-रूह के लिए साँप आशियाँ में है
हिकमत से है ये ख़ाक का पुतला बना हुआ
नूर आँख में है उस के तो मग़्ज़ उस्तुख़्वाँ में है
'आतिश' बुलंद-पाया है दरगाह यार की
हफ़्तुम फ़लक की रिफ़'अत इसी आस्ताँ में है
'ārif hai vo jo husn kā juuyā jahāñ meñ hai
bāhar nahīñ hai yūsuf isī kārvāñ meñ hai
piirī meñ shaġhl-e-mai hai javānana roz-o-shab
bū-e-bahār aatī hamārī ḳhizāñ meñ hai
hotā hai gul ke sūñghe se duunā girafta dil
mujh sā bhī bad-dimāġh kam is bostāñ meñ hai
pusht-e-ḳhamīda dekh ke hotā huuñ nā'ra-zan
kartā huuñ sarf-e-tīr jo zor is kamāñ meñ hai
dikhlā rahī hai dil kī safā do-jahāñ kī sair
kyā ā.īna lagā huā apne makāñ meñ hai
dīvāna jo na 'ishq se ho aadmī nahīñ
husn-parī kā jalva tilism-e-jahāñ meñ hai
parvānoñ kī tarah hai hujūm-e-qadah-kashāñ
raushan charāġh-e-bāda jo muġh kī dukāñ meñ hai
us dilrubā ke kūche meñ aage havā se jaa.e
itnī to jaan ab bhī tan-e-nā-tavāñ meñ hai
duniyā se kuuch karnā hai ik roz rahravo
bāñg-e-jaras se shor yahī kārvāñ meñ hai
paḌh saktā sarnavisht kā matlab koī nahīñ
mā'lūm kuchh nahīñ ki ye ḳhat kis zabāñ meñ hai
ā.inda-o-ravinda kī chaltī haiñ Thokareñ
jaada jo apnā thā usī ḳhvāb-e-girāñ meñ hai
kushte haiñ baaġh meñ bhī tirī teġh-e-nāz ke
bū-e-shahīd laala meñ aur arġhavāñ meñ hai
'āshiq ke rañg-e-zard ko dekho to hañs paḌo
tāsīr us meñ bhī hai vo jo za.afarāñ meñ hai
mā'dūm vo kamar hai na mauhūm vo dahan
kahte haiñ shā'ir un ke jo kuchh kuchh gumāñ meñ hai
gul TūTte haiñ hote haiñ bulbul asīr-e-dām
sayyād musta'id madad-e-bāġhbāñ meñ hai
sarkash kī manzilat hai subuk pesh-e-ḳhāksār
vo tamkanat zamīñ kī kahāñ āsmāñ meñ hai
sumbul se hāl-e-gul huuñ maiñ ye kah ke pūchhtā
kis silsile meñ tū hai ye kis ḳhāndāñ meñ hai
dil meñ ḳhayāl-e-gesu-e-mushkīñ hai bad balā
ye murġh-e-rūh ke liye saañp āshiyāñ meñ hai
hikmat se hai ye ḳhaak kā putlā banā huā
nuur aañkh meñ hai us ke to maġhz ustuḳhāñ meñ hai
'ātish' buland-pāya hai dargāh yaar kī
haftum falak kī rif'at isī āstāñ meñ hai
عارف ہے وہ جو حسن کا جویا جہاں میں ہے
باہر نہیں ہے یوسف اسی کارواں میں ہے
پیری میں شغل مے ہے جوانانہ روز و شب
بوئے بہار آتی ہماری خزاں میں ہے
ہوتا ہے گل کے سونگھے سے دونا گرفتہ دل
مجھ سا بھی بد دماغ کم اس بوستاں میں ہے
پشت خمیدہ دیکھ کے ہوتا ہوں نعرہ زن
کرتا ہوں صرف تیر جو زور اس کماں میں ہے
دکھلا رہی ہے دل کی صفا دو جہاں کی سیر
کیا آئینہ لگا ہوا اپنے مکاں میں ہے
دیوانہ جو نہ عشق سے ہو آدمی نہیں
حسن پری کا جلوہ طلسم جہاں میں ہے
پروانوں کی طرح ہے ہجوم قدح کشاں
روشن چراغ بادہ جو مغ کی دکاں میں ہے
اس دل ربا کے کوچہ میں آگے ہوا سے جائے
اتنی تو جان اب بھی تن ناتواں میں ہے
دنیا سے کوچ کرنا ہے اک روز رہروو
بانگ جرس سے شور یہی کارواں میں ہے
پڑھ سکتا سر نوشت کا مطلب کوئی نہیں
معلوم کچھ نہیں کہ یہ خط کس زباں میں ہے
آئندہ و روندہ کی چلتی ہیں ٹھوکریں
جادہ جو اپنا تھا اسی خواب گراں میں ہے
کشتے ہیں باغ میں بھی تری تیغ ناز کے
بوئے شہید لالہ میں اور ارغواں میں ہے
عاشق کے رنگ زرد کو دیکھو تو ہنس پڑو
تاثیر اس میں بھی ہے وہ جو زعفراں میں ہے
معدوم وہ کمر ہے نہ موہوم وہ دہن
کہتے ہیں شاعر ان کے جو کچھ کچھ گماں میں ہے
گل ٹوٹتے ہیں ہوتے ہیں بلبل اسیر دام
صیاد مستعد مدد باغباں میں ہے
سرکش کی منزلت ہے سبک پیش خاکسار
وہ تمکنت زمیں کی کہاں آسماں میں ہے
سنبل سے حال گل ہوں میں یہ کہہ کے پوچھتا
کس سلسلہ میں تو ہے یہ کس خانداں میں ہے
دل میں خیال گیسوئے مشکیں ہے بد بلا
یہ مرغ روح کے لیے سانپ آشیاں میں ہے
حکمت سے ہے یہ خاک کا پتلا بنا ہوا
نور آنکھ میں ہے اس کے تو مغز استخواں میں ہے
آتشؔ بلند پایہ ہے درگاہ یار کی
ہفتم فلک کی رفعت اسی آستاں میں ہے