महशर में भी किसी के उठाएँगे नाज़ हम
ऐसे नियाज़-मंद हैं ऐ बे-नियाज़ हम
होगी फ़क़त शरीक-ए-दुआ एक बेकसी
मय्यत पर अपनी आप पढ़ेंगे नमाज़ हम
वाइ'ज़ यही न कह दे कि पैदा ही क्यों हुए
दुनिया में आएँ और रहें पाक-बाज़ हम
इस में भी कोई भेद है तुम जानते नहीं
कहते हैं एक एक से क्यों दिल के राज़ हम
जब सुनते हैं कि आप पे दो चार मर गए
दिल्वाते हैं रक़ीबों की अपने नियाज़ हम
वो दिन गए कि 'दाग़' थी हर दम बुतों की याद
पढ़ते हैं पाँच वक़्त की अब तो नमाज़ हम
mahshar meñ bhī kisī ke uThā.eñge naaz ham
aise niyāz-mand haiñ ai be-niyāz ham
hogī faqat sharīk-e-duā ek bekasī
mayyat par apnī aap paḌheñge namāz ham
vaa.iz yahī na kah de ki paidā hī kyoñ hue
duniyā meñ aa.eñ aur raheñ pāk-bāz ham
is meñ bhī koī bhed hai tum jānte nahīñ
kahte haiñ ek ek se kyoñ dil ke raaz ham
jab sunte haiñ ki aap pe do chaar mar ga.e
dilvāte haiñ raqīboñ kī apne niyāz ham
vo din ga.e ki 'dāġh' thī har dam butoñ kī yaad
paḌhte haiñ pāñch vaqt kī ab to namāz ham
محشر میں بھی کسی کے اٹھائیں گے ناز ہم
ایسے نیاز مند ہیں اے بے نیاز ہم
ہوگی فقط شریک دعا ایک بیکسی
میت پر اپنی آپ پڑھیں گے نماز ہم
واعظ یہی نہ کہہ دے کہ پیدا ہی کیوں ہوئے
دنیا میں آئیں اور رہیں پاک باز ہم
اس میں بھی کوئی بھید ہے تم جانتے نہیں
کہتے ہیں ایک ایک سے کیوں دل کے راز ہم
جب سنتے ہیں کہ آپ پہ دو چار مر گئے
دلواتے ہیں رقیبوں کی اپنے نیاز ہم
وہ دن گئے کہ داغؔ تھی ہر دم بتوں کی یاد
پڑھتے ہیں پانچ وقت کی اب تو نماز ہم