लिपटती है बहुत याद-ए-वतन जब दामन-ए-दिल से
पलट कर इक सलाम-ए-शौक़ कर लेता हूँ मंज़िल से
नज़र आए जब आसार-ए-जुदाई रंग-ए-महफ़िल से
निगाह-ए-'यास' बेगाना हुई यारान-ए-यक-दिल से
उभरने के नहीं बहर-ए-फ़ना में डूबने वाले
दुर-ए-मक़सूद ही ग़म है तो फिर क्या काम साहिल से
तसव्वुर लाला-ओ-गुल का ख़िज़ाँ में भी नहीं मिटता
निगाह-ए-शौक़ वाबस्ता है अब तक नक़्श-ए-बातिल से
नहीं मा'लूम क्या लज़्ज़त उठाई है असीरी में
दिल-ए-वहशी फड़क उठता है आवाज़-ए-सलासिल से
किसी शय में न होगी बादा-ए-इरफ़ाँ की गुंजाइश
लड़ा ले साग़र-ए-जम को भी कोई शीशा-ए-दिल से
तसव्वुर ने दिखाया शाहिद-ए-मक़्सूद का जल्वा
उतर आई है लैला सर-ज़मीन-ए-दिल पे महमिल से
रहेगी चार दीवार-ए-अनासिर दरमियाँ कब तक
उठेगा ज़लज़ला इक दिन इसी बैठे हुए दिल से
कहाँ तक पर्दा-ए-फ़ानूस से सर की बला टलती
अज़ल से लाग थी बाद-ए-फ़ना को शम-ए-महफ़िल से
यहीं से सैर कर लो 'यास' इतनी दूर क्यूँ जाओ
अदम आबाद कर डांडा मिला है कू-ए-क़ातिल से
lipaTtī hai bahut yād-e-vatan jab dāman-e-dil se
palaT kar ik salām-e-shauq kar letā huuñ manzil se
nazar aa.e jab āsār-e-judā.ī rañg-e-mahfil se
nigāh-e-'yās' begāna huī yārān-e-yak-dil se
ubharne ke nahīñ bahr-e-fanā meñ Dūbne vaale
dur-e-maqsūd hī ġham hai to phir kyā kaam sāhil se
tasavvur lāla-o-gul kā ḳhizāñ meñ bhī nahīñ miTtā
nigāh-e-shauq vābasta hai ab tak naqsh-e-bātil se
nahīñ ma.alūm kyā lazzat uThā.ī hai asīrī meñ
dil-e-vahshī phaḌak uThtā hai āvāz-e-salāsil se
kisī shai meñ na hogī bāda-e-irfāñ kī gunjā.ish
laḌā le sāġhar-e-jam ko bhī koī shīsha-e-dil se
tasavvur ne dikhāyā shāhid-e-maqsūd kā jalva
utar aa.ī hai lailā sar-zamīn-e-dil pe mahmil se
rahegī chaar dīvār-e-anāsir darmiyāñ kab tak
uThegā zalzala ik din isī baiThe hue dil se
kahāñ tak parda-e-fānūs se sar kī balā Taltī
azal se laag thī bād-e-fanā ko sham-e-mahfil se
yahīñ se sair kar lo 'yās' itnī duur kyuuñ jaao
adam ābād kar DāñDā milā hai kū-e-qātil se
لپٹتی ہے بہت یاد وطن جب دامن دل سے
پلٹ کر اک سلام شوق کر لیتا ہوں منزل سے
نظر آئے جب آثار جدائی رنگ محفل سے
نگاہ یاسؔ بیگانہ ہوئی یاران یک دل سے
ابھرنے کے نہیں بحر فنا میں ڈوبنے والے
در مقصود ہی غم ہے تو پھر کیا کام ساحل سے
تصور لالہ و گل کا خزاں میں بھی نہیں مٹتا
نگاہ شوق وابستہ ہے اب تک نقش باطل سے
نہیں معلوم کیا لذت اٹھائی ہے اسیری میں
دل وحشی پھڑک اٹھتا ہے آواز سلاسل سے
کسی شے میں نہ ہوگی بادۂ عرفاں کی گنجائش
لڑا لے ساغر جم کو بھی کوئی شیشۂ دل سے
تصور نے دکھایا شاہد مقصود کا جلوہ
اتر آئی ہے لیلیٰ سر زمین دل پہ محمل سے
رہے گی چار دیوار عناصر درمیاں کب تک
اٹھے گا زلزلہ اک دن اسی بیٹھے ہوئے دل سے
کہاں تک پردۂ فانوس سے سر کی بلا ٹلتی
ازل سے لاگ تھی باد فنا کو شمع محفل سے
یہیں سے سیر کر لو یاسؔ اتنی دور کیوں جاؤ
عدم آباد کر ڈانڈا ملا ہے کوئے قاتل سے