खड़ी है शाम कि ख़्वाब-ए-सफ़र रुका हुआ है
यक़ीन क्यूँ नहीं आता अगर रुका हुआ है
गुज़रने वाले थे जो भी गुज़र गए लेकिन
मियान-ए-राह कोई बे-ख़बर रुका हुआ है
बरस रहा है न छटता है ये कई दिन से
जो एक अब्र मिरी ख़ाक पर रुका हुआ है
रवाँ भी सिलसिला-ए-अश्क है अभी कुछ कुछ
ये क़ाफ़िला जो कहीं बेश-तर रुका हुआ है
अभी निकल नहीं सकता घरों से कोई यहाँ
कि सैल-ए-आब अभी दर-ब-दर रुका हुआ है
हर एक शय है किसी राख में बदलने को
कहीं जो ख़ाना-ए-ख़स में शरर रुका हुआ है
चली हुई थी मिरी बात जितने ज़ोरों से
उसी हिसाब से इस का असर रुका हुआ है
पहुँच सके किसी मंज़िल पे क्या मुसाफ़िर-ए-दिल
कि चल रहा है ब-ज़ाहिर मगर रुका हुआ है
ये हर्फ़ ओ सौत करिश्मे हैं सब उसी के 'ज़फ़र'
लहू के साथ रगों में जो डर रुका हुआ है
khaḌī hai shaam ki ḳhvāb-e-safar rukā huā hai
yaqīn kyuuñ nahīñ aatā agar rukā huā hai
guzarne vaale the jo bhī guzar ga.e lekin
miyān-e-rāh koī be-ḳhabar rukā huā hai
baras rahā hai na chhaTtā hai ye ka.ī din se
jo ek abr mirī ḳhaak par rukā huā hai
ravāñ bhī silsial-e-ashk hai abhī kuchh kuchh
ye qāfila jo kahīñ besh-tar rukā huā hai
abhī nikal nahīñ saktā gharoñ se koī yahāñ
ki sail-e-āb abhī dar-ba-dar rukā huā hai
har ek shai hai kisī raakh meñ badalne ko
kahīñ jo ḳhāna-e-ḳhas meñ sharar rukā huā hai
chalī huī thī mirī baat jitne zoroñ se
usī hisāb se is kā asar rukā huā hai
pahuñch sake kisī manzil pe kyā musāfir-e-dil
ki chal rahā hai ba-zāhir magar rukā huā hai
ye harf o saut karishme haiñ sab usī ke 'zafar'
lahū ke saath ragoñ meñ jo Dar rukā huā hai
کھڑی ہے شام کہ خواب سفر رکا ہوا ہے
یقین کیوں نہیں آتا اگر رکا ہوا ہے
گزرنے والے تھے جو بھی گزر گئے لیکن
میان راہ کوئی بے خبر رکا ہوا ہے
برس رہا ہے نہ چھٹتا ہے یہ کئی دن سے
جو ایک ابر مری خاک پر رکا ہوا ہے
رواں بھی سلسلۂ اشک ہے ابھی کچھ کچھ
یہ قافلہ جو کہیں بیشتر رکا ہوا ہے
ابھی نکل نہیں سکتا گھروں سے کوئی یہاں
کہ سیل آب ابھی در بدر رکا ہوا ہے
ہر ایک شے ہے کسی راکھ میں بدلنے کو
کہیں جو خانۂ خس میں شرر رکا ہوا ہے
چلی ہوئی تھی مری بات جتنے زوروں سے
اسی حساب سے اس کا اثر رکا ہوا ہے
پہنچ سکے کسی منزل پہ کیا مسافر دل
کہ چل رہا ہے بظاہر مگر رکا ہوا ہے
یہ حرف و صوت کرشمے ہیں سب اسی کے ظفرؔ
لہو کے ساتھ رگوں میں جو ڈر رکا ہوا ہے