यूँ तो ये अन्फ़ुस-ओ-आफ़ाक़ हैं मज़हर मेरे
एक दुनिया अभी आबाद है अन्दर मेरे
दायरा-वार नहीं एक ही मरकज़ को मुहीत
मैं वो परकार बदलते रहे महवर मेरे
कितने दुख हैं जो रहे तिश्ना-ए-इज़हार अब तक
कूज़ा-ए-हर्फ़ से सिमटे न समुंदर मेरे
अपने क़ामत का भी अंदाज़ा हो कुछ तो मुझ को
लेकिन आता ही नहीं कोई बराबर मेरे
जिन महाज़ों पे क़वी पाया न दुश्मन अपना
उन महाज़ों से पलट आए हैं लश्कर मेरे
हर क़दम पर मिरी पहचान बदल जाती है
जितने रिश्ते हैं मिरे उतने ही पैकर मेरे
आसमाँ-गीर है इस हब्स में मेरी परवाज़
इन फ़ज़ाओं में तवाना तो हैं शहपर मेरे
मुश्तरक जज़्बा-ए-इज़हार हो फिर क्यों न कहूँ
सब सुख़न मेरे हैं और सारे सुख़नवर मेरे
मेरे इंकार की तौहीन न कीजे 'ताबिश'
आप आँकें न ख़ज़फ़-रेज़ों से गौहर मेरे
yuuñ to ye anfus-o-āfāq haiñ maz.har mere
ek duniyā abhī ābād hai andar mere
dā.era-vār nahīñ ek hī markaz ko muhīt
maiñ vo parkār badalte rahe mehvar mere
kitne dukh haiñ jo rahe tishna-e-iz.hār ab tak
kūza-e-harf se simTe na samundar mere
apne qāmat kā bhī andāza ho kuchh to mujh ko
lekin aatā hī nahīñ koī barābar mere
jin mahāzoñ pe qavī paayā na dushman apnā
un mahāzoñ se palaT aa.e haiñ lashkar mere
har qadam par mirī pahchān badal jaatī hai
jitne rishte haiñ mire utne hī paikar mere
āsmāñ-gīr hai is habs meñ merī parvāz
in fazāoñ meñ tavānā to haiñ shahpar mere
mushtarak jazba-e-iz.hār ho phir kyoñ na kahūñ
sab suḳhan mere haiñ aur saare suḳhanvar mere
mere inkār kī tauhīn na kiije 'tābish'
aap āñkeñ na ḳhazaf-rezoñ se gauhar mere
یوں تو یہ انفس و آفاق ہیں مظہر میرے
ایک دنیا ابھی آباد ہے اندر میرے
دائرہ وار نہیں ایک ہی مرکز کو محیط
میں وہ پرکار بدلتے رہے محور میرے
کتنے دکھ ہیں جو رہے تشنۂ اظہار اب تک
کوزۂ حرف سے سمٹے نہ سمندر میرے
اپنے قامت کا بھی اندازہ ہو کچھ تو مجھ کو
لیکن آتا ہی نہیں کوئی برابر میرے
جن محاذوں پہ قوی پایا نہ دشمن اپنا
ان محاذوں سے پلٹ آئے ہیں لشکر میرے
ہر قدم پر مری پہچان بدل جاتی ہے
جتنے رشتے ہیں مرے اتنے ہی پیکر میرے
آسماں گیر ہے اس حبس میں میری پرواز
ان فضاؤں میں توانا تو ہیں شہپر میرے
مشترک جذبۂ اظہار ہو پھر کیوں نہ کہوں
سب سخن میرے ہیں اور سارے سخنور میرے
میرے انکار کی توہین نہ کیجے تابشؔ
آپ آنکیں نہ خذف ریزوں سے گوہر میرے